《香港六月：亞太區文化傳承論壇》第一場〈從參政到公民行動〉 (2025-06-12)

2025年6月12號，一場橫跨幾個時區、凝聚亞太區港人聲音嘅網上文化論壇隆重登場。呢場由「香港時空」、「澳港聯」、「日本香港人協會」、「香港民主女神」、「台灣香港協會」五個團體合辦嘅《香港六月：亞太區文化傳承論壇》系列，首場以「由議政參政走到公民行動」為題，請嚟五位身處唔同國家、經歷各異嘅離散港人代表，分享佢哋點樣喺異地生根，甚至起勢搞公民社會。主持係「香港時空」黎廣德，講者陣容如下：

• 許智峯（澳洲）：前立法會議員、澳港聯榮譽主席、而家喺澳洲做執業律師；
• 任建峯（澳洲）：前香港律師，而家係墨爾本大學法學院做博士研究生，同樣係澳港聯榮譽主席；
• 康駿銘（台灣）：台灣基進國際部專員，自稱係港裔台灣人；
• 桑普（台灣）：律師、政論人、台灣香港協會理事長，長期關注港台議題；
• 李伊東（日本）：「香港民主女神」創辦人，一直係日本推動流亡港人議題

身份認同係起點：離開咗，仲係唔係香港人？

黎廣德開場講得清楚：「香港六月」唔淨止係一個月份，而係一種歷史負載同文化記憶。喺國安法之後，大量香港人選擇離開，有啲係無奈，有啲係主動。無論係台灣、日本、澳洲定紐西蘭，每個地方嘅社會環境都唔同，港人面對嘅挑戰自然唔一樣。個核心問題係：離開咗香港，我哋仲係唔係香港人？點樣俾下一代知道自己係邊度嚟？

李伊東分享，喺日本搞文化活動其實唔容易，日本人對香港文化唔陌生，從王家衛、周星馳、甚至九龍城寨嘅迷人形象都有印象，但佢哋對2019年之後嘅香港唔係咁清楚。佢話，「好多日本人都以為香港好似仲係九十年代嗰個金融之都」。佢覺得，日本港人要好清晰講明：香港人唔等如中國人，唔係民族問題，而係價值觀問題——香港人追求法治、自由、多元，唔係威權統治。

喺台灣：你係邊度人唔重要，你有冇同行人先重要

康駿銘講，台灣人對香港有兩極印象，有啲覺得香港人叻、有文化、有國際視野；但亦有啲覺得港人高傲、同中共走得近。佢自己係「港裔台灣人」，參與政治同基層工作時成日會被問：「你係香港人？點解會支持台灣獨立？」康話，關鍵唔係你出身邊度，而係你而家想守護啲咩價值。桑普補充，香港人以前對台灣政治漠不關心，「甚至有啲人覺得台灣政治好亂」，呢啲舊印象令台灣本土派有少少戒心。佢建議港人唔好淨係搞自己圈子，而係要走入社區、做義工、辦講座、開市集，咁樣先可以交到朋友，搵到盟友。

喺澳洲：講得出「我係香港人」，都唔代表識表達自己

任建峯講，喺澳洲最大挑戰就係「被歸類」：大部分人會將所有講中文嘅人一概歸納做「Chinese」，連係香港人定台灣人都未必分得清。「我講我係Hong Konger，佢哋會問：係咪中國一部分？」佢認為港人要主動建立身份認同，同時融入唔同層面社群，包括教育界、社福界、以至工會。許智峯就話，港人唔可以一味將自己當成受害者咁包裝，要有策略參與主流社會，又要堅持講返香港人嘅價值同立場。他形容，「我哋既唔可以做主流社會嘅影子，也唔可以永遠只做圈內自High。」要做嘅係：「主流參與＋香港人自覺」。

半自由狀態下，仲有無聲音可以出？

黎廣德點出一個殘酷現實：「好多港人喺海外都處於一種半自由狀態」，唔敢show面、唔敢講嘢，因為屋企人仲喺香港。李伊東話，喺日本搞活動要特別注意保護參與者，有時用匿名展覽、有時包場播放紀錄片，慢慢吸引沉默大多數出嚟睇、出嚟傾。

康駿銘認為，要提供非對抗性空間，令大家可以喺文化中找到歸屬，例如辦粵語年宵、香港書市、文學對談等。桑普同意：「如果港人連開口都驚，就冇可能有集體記憶。」任建峯最後強調，唔好淨係搞網上活動或者圈內聚會，要參與本地議會、社區會議，真正走入制度之內，先可以有轉變嘅機會。許智峯再講，「我哋唔可以再等人幫手發聲，香港人要學識自己拎mic發聲。」

尾聲：文化傳承，唔只靠回憶

論壇最後，各講者都講到：無論喺邊度落腳，港人都應該重新思考點樣將身份變成行動。流散未必係結束，反而可能係另一個開始——一個建構新嘅公民社會，亦都係香港另一種延續。